Gisting í skálum Ferðafélags Skagfirðinga sýnist í fljótu bragði hafi verið með minna móti s.l. sumar. Flestar gistinætur voru seldar í Hildarseli eins og s.l. tvö ár.  Dálítið hefur verið um það í sumar að hópar hafi komið að Ingólfsskála án þess að hafa pantað skálann áður. Þetta segir allt sem þarf um nauðsyn þess að læsa skálunum. Einnig veit undirritaður til þess að hópar hafi notað Hildarsel í leyfisleysi. Því bendir margt til þess að læsa þurfi skálanum í Austurdalnum með sama fyrirkomulagi og er í Ingólfsskála. Í Hildarseli er forstofa þannig innri hurð yrði þá læst.

Næsta verkefni stjórnarinnar er viðhaldsferð fram í Hildarsel í október. Ætlunin er að endurnýja reykskynjara, slökkvitæki, gasbirgðir og fl.

Ágúst Guðmundsson  

Ferðafélag Skagfirðinga auglýsir gönguferð laugardaginn 17. júlí n.k.  

Gengið verður frá Illugastöðum á Laxárdal ytri, norður Engjadal. Þar er m.a. að sjá tóftir fornbýlisins Skínanda. Áfram verður haldið norður eftir,  vestan megin við Bjarnarfell og upptök Fossár fundin. Þaðan að eyðibýlinu Fossseli. Fallegt stuðlaberg er við fossa í Miðá þar sem áin sameinast Fossá. Loks verður Fossánni fylgt til sjávar.  Göngutími er áætlaður um 5-6 klst og vegalengd um 20 km. 
Lagt verður af stað frá Faxatorgi kl. 09.  Þátttakendur þurfa að koma sér á einkabílum að Illugastöðum. Rúta mun svo sækja göngumenn að Fossi á Skaga og koma við á Illugastöðum í bakaleið ef þarf.
Þátttökugjald er kr. 2 500 fyrir félaga í Ferðafélagi Skagfirðinga/Íslands, kr. 3 500 fyrir aðra.  Fararstjóri verður Ágúst Guðmundsson.  Skráningar er best að senda á netfangið Þetta tölvupóstfang er varið gegn ruslpósts þjörkum, Þú verður að hafa JavaScript virkt til að sjá það. .    Einnig má hringja í síma 862 5907  (Ágúst)  sem veitir nánari upplýsingar ef þörf krefur.

Athugið að fyrirvari er gerður á um að veður verði þokkalegt.  Illugastaðir – Þverárvötn - Fossá Skór: 2

Föstudaginn 16. október s.l. stóð stjórn FS fyrir viðhaldsferð fram í Hildarsel. Með í ferðinni voru Hjalti Pálsson, Snorri Styrkársson, Sigurþór Hjörleifsson heiðursfélagi FS, Björn Svavarsson, Sigurlaug Ebba Kristjánsdóttir, Jóhann Rögnvaldsson, Birgir Friðriksson  og Óskar Halldórsson, Elín Björnsdóttir, Sigurður Sigfússon, Stefán Ingi Sigurðsson og Ágúst Guðmundsson. Frekar lítið var í ánum og gekk því ferðin vel.
Voru gasbirgðir endurnýjaðar og skálinn skúraður. Að þrifunum kom aðallega fjölskyldan í Kvistholti. Alltaf kemur á óvart hversu mikið rusl gestir skilja eftir sig. Annars er umgengni um skála FS yfirleitt til fyrirmyndar. Skálinn að Hildarseli var málaður fyrir tveimur árum. Ánægjulegt var að sjá hversu vel hefur til tekist, en veggir voru sem nýmálaðir.
Snorri kom sterkur inn og grillaði læri ofan í mannskapinn. Matarlyst leiðangursmanna reyndist í besta lagi. Það var mál manna þarna framfrá að áhugavert væri að styrkja undirstöður skálans, en hann á það til að hreyfast í suðvestan átt.
Leiðangursmenn héldu heim á leið á laugardag. Kók og pylsa í Varmahlíð.

Ágúst Guðmundsson
 

Ferðafélag Skagfirðinga og Ferðafélagið Hörgur gengust sameiginlega fyrir göngu yfir Nýjabæjarfjall. Var gengið frá Skatastöðum í Austurdal í Skagafirði yfir í Villingadal í Eyjafirði laugardaginn 25. júlí og tók ferðin 14 tíma. Leiðsögumenn voru Ágúst Guðmundsson og Bjarni E. Guðleifsson. Þátttakendur voru 38 talsins og komust færri að en vildu. Gengið var úr 240 metra hæð og hæst farið í nærri 1170 metra hæð og var þessi leið talin með hæstu fjallvegum landsins fyrr á öldum. Við Skatastaði var farið á kláf austur yfir Jökulsá og síðan gengið fram að Tinnárseli, inn Tinnárdal og upp Illagil á hásléttuna. Þar hófst löng ganga á stórgrýttu landi þar sem voru snjóskaflar í lægðum og sums staðar þurfti að vaða læki. Var stefna tekin á Botn Svardals, sem er afdalur Villingadals, farið þar niður brattan dalbotninn og gengið heim að bænum Villingadal. Daginn fyrir ferðina snjóaði víða í fjöll og var örvænt um að skynsamlegt væri að fara þessa ferð. Hins vegar reyndist hið ágætasta veður þarna á öræfunum, logn allann daginn, og má segja að veðurguðirnir hafi sýnt á sér allar hliðar, stuttan tíma í senn; regn, hundslappadrífa, haglél, þoka og ekki síst glampandi sólskin, allt í logni. Göngunni veður kannski best lýst þannig að dalirnir voru afar fagrir og góðursælir, en á Nýjabæjarfjalli var afskaplega auðnarlegt og seingengið stórgrýti.

Jónas Hallgrímsson lenti í hrakningum á þessari leið 20. ágúst 1839 og komst nær dauða en lífi til Eyjafjarðar. Var hann að leita að nýtanlegum brúnkolum í Illagili. Er talið að sviplegur dauðdagi hans eftir fótbrot í Kaupmannahöfn sex árum síðar sé að einhverju leyti afleiðing þeirra meina sem hann bar eftir hrakningana á Nýjabæjarfjalli. Í ferðinni kynnti Bjarni E. Guðleifsson ævi og störf Jónasar, einkum þessa afdrifaríku ferð yfir Nýjabæjarfjall. Nú vita þátttakendur í göngunni hve auðvelt er að villast á þessu kennileitalausa og víðáttumikla hálendi. Hugleiðingar í ferðinni um hrakninga Jónasar vöktu nokkrar spurningar.